Mar 14 | ASO | STEP | Isilaele' aleveti avotemote Aigita misubou' minani' gameneu' O'moso'mo ise'ine izingumu' gelo holise' mino noso' nite' naa' noune' gamene ado' lulu izamine' beleti naa' noune' holise' nene olosa gamene seta' lumo ha neivo eveneto' medeli mini O'moso inite' lehizi-daa' ave nabasi mono' apizi ngimaa' avesi Izesu'ni analo' di bililisa gilani'za holise' gameneu' nene evene' vai' di gese' igi ningi nizavo analo' dalone' nene lovo di soto' ikelizanako holiseku' nene alamolone li zegeni analo' di bililiza akamu' vise' i'mi vi minani'.

Mark 14

Zuda Veliti Mono' Ve Naba Nete Izesu'ni Bililizani' Gamazi Lani'

(Mataio' 26:1-5; Luka' 22:1-2; Zohane' 11:45-53)

1 Isilaele' aleveti avotemote Aigita misubou' minani' gameneu' O'moso'mo ise'ine izingumu' gelo holise' mino noso' nite' naa' noune' gamene ado' lulu izamine' beleti naa' noune' holise' nene olosa gamene seta' lumo ha neivo eveneto' medeli mini O'moso inite' lehizi-daa' ave nabasi mono' apizi ngimaa' avesi Izesu'ni analo' di bililisa gilani'za holise' gameneu' nene evene' vai' di gese' igi ningi nizavo analo' dalone' nene lovo di soto' ikelizanako holiseku' nene alamolone li zegeni analo' di bililiza akamu' vise' i'mi vi minani'.

Betani Numuda Vene' Mali'mo Izesu'ni Uveli Leke-dine' Gamazi

(Mataio' 26:6-13; Zohane' 12:1-8)

3 Ne'mine igi nizavo Izesu' Betani numuda mino ganadise gozopo' ma gize dave Simoni' ne'mi numu'veu' dizo mino noso' nite' no neivo vene' mali'mo unuvo laminekisi uveli lamine' gehepeve meni've dizo minine' gulive nalida nene luhuvo laminekisi gehenidunu' lili' ani' botoloku' minine' nene do ogo botololi'mi velela ize si'ze hulo a'minguti' uveli nene Izesu' godolou' leke-dine'. 4 Leke-davo evene' linge ma nete mulu'ningu' goloso gili engiku' ti' li lani': Uveli nene nani monovomu' do labuluvo neive. 5 A'mine uveli nene maketi miladini sigisi hadeti Kina (K600) ivile' ivosa moni naba dadinako maketi mili meni di goho' gahali' ngimilizanako ve li elemikevo 6 Izesu' aza gelo ti' lo line': Huli-dilo. Aza nanite' do goloso ogavosa genivesi gamazi nili-dave. Vene' ne'mo inite' lamine' noo-nidivo ede vive. 7 Nene nanitekumu' ve. Lingine nene goho' gahali' alevesi mini di vi minilizani' nenako lingine ngele'mize lamine' olone li gililizani' nene nani gamenela gililizahe a'mido' ha ngele'mize lamine' ilisani'za nezesi nene mudive ma mini di vi minamilisave. 8 Aza ilido' o minine' nite' nene ogave. Galese izi-nidilizangumu' nene gomu' oko'ne do lamine' o-nedo holo-nedave. 9 Naza lamineto' lo-lengemeloze. Gililo. Mono' gamazi lamine' mene di misubou' misubou' moni li-ngimilizadaa nene eze guvele nene ha gili minilizave li aza inite' o-nidine' nemukisi li soto' igi li-ngimilizave.

Zuda' Aza Izesu'ni nGelebizelesa Lo-ngimine' Gamazi

(Mataio' 26:14-16; Luka' 22:3-6)

10 Ne'mine ogavo Izesu' izipahala zuho tuvelu engikuti' Kelioto numudoti' ve ma gulive Zuda' aza Izesu'ni ngelebizekuvo dalizave lo eveneto' medeli mini O'moso inite' lehizi-daa' ave nabala vo lo-ngimine'. 11 Lo-ngemavo mulu'ningu' lamine' gili moni emelone lii li huki-dikevo aza vo Izesu'ni nene ngelebizeli akamu' vise' ogo minine'.

O'moso'mo Ise'ine Izingumu' Gili Mini Naa' Noso' Nite' Nene Izesu' Izipahala Zuhosi Nani' Gamazi

(Mataio' 26:17-25; Luka'22:7-14, 21-23; Zohane' 13:21-30)

12 Zuda vete lulu izamine' beleti naa' noune' holise' nene api' neivo O'moso'mo avotemotine ise'ine ize-ngidingumu' gele mino naa' noune' noso' nite' naloningumu' sipisipi angale belaa' noune' gamenelo' nene Izesu' izipahala zuho nete ti' li longo' i-dani': O'moso'mo avotemotine ise'ine ize-ngidingumu' gelo naa' noune' noso' nite' nene zala vo do va'va' o-gedelone lo nolane. 13 Likevo izipahala zuhouti' ve seta' ma nongimiselo ti' lo lo-ngimine': Numuno nabala vi nihetelasivo ve mali'mo misubo somou' noso ohizo geho navo votene' ilisaze. Lingine e'meti vilizo. 14 Numuno mau' dizo vavo ma a'mingu' vi numuno ne'mi melehine ti' li li-imilizo: Tisate ne'mo ti' lo lave: Nazasi izipaha'nesi O'moso'mo avotemotine ise'ine izingumu' gelo naa' noso' nite' nalone' numuno lulo nene zau' nalone. 15 Likesivo numuno meleho aza numuno veleto' mino gala'mudo' mino inguti' veleto' nene lulo nabasi miningu' inite' mata' avilise' i nizani' nene lengelebizeleseive. A'mingu' nene noso' nitete di va'va' ilizo. 16 Ti' lo lo-ngemavo izipahala seta' ingine oti numuno nabala vi heteli lo-ngimine' ma'mine ogavo O'moso'mo ise'ine izingumu' gelo naa' noune' noso' nite' nene di va'va' asine'.

17 Ne'mine ikesivo mo nivenga' molavo Izesu' aza izipahala zuho tuvelu nesi ani'. 18 Noso' nite' ni nizavo Izesu' aza ti' lo line': Lamineto' ma lo-lengemeloze. Gililo. Noso' nite' nonunive lengikuti' mali'mo nenikumu' me neive lo biluvaliti a'ningu' molaloseive. 19 Lavo ingine mulumo gili igi hamo' hamo' longo' i-dani'. Nenikumu' lamo nolosane. Olo. 20 Ne'mine li longo' i-dikevo aza ti' lo lo-ngimine': A'mine ve nene lapese hamokuti' nonunive tuvelu lengikuti' hamoli'mo ne'mine oloseive losa noluve. 21 Ee, O'mosolati' ve gihile nenikumu' polohetelite gizi nizado' e'meto heleloni' akalo' novuvoni'za biluvalite neni' dalizave lo do soto' o-nedelive nene agae, mo mulumo gono goloso daloseinako nemu' a'mine ve aza izeleho ma gedamidiniko a'mine mulumo gono soto' o-delesa neine' akalo' nene ma mine molo minamivo lamine' o minidine.

Izesu' Lebeni Nite' Api' Ogo nGimine' Gamazi

(Mataio' 26:26-30; Luka' 22:14-20; 1 Kolidi 11:23-25)

22 Noso' nite' ninavo Izesu' aza beleti do O'moso opo'ni lo gito nongemo ti' lo line': Dalo. Mene neni' me'mele'ne ma ne neive. 23 Ne'mine lo vaini gomise do O'moso opo'ni lo ngemavo a'minguti' vaini noso ninavo 24 ti' lo line': O'moso'mo lo huko-lidine' gamazi nene do ele'vole' iline' vanise'ne nene evene' mukikumu' ve lo lekeloni' vanise mene neive. 25 Lamineto' lo-lengemelove. Naza vaini gihile'mi novozo nene gohi ma namo mino alinge' O'moso'mo gizebo o-lengedeline' gamenelo' nene a'mine novozo atoli'mine gosoho' nalosuve. 26 Ne'mine lavo mono' nama lisa limi heta igi Oliva golola dizi vani'.

Izesu'ni Petolo' Ataize Lo-delingumu' Lo-ngimine' Gamazi

(Mataio' 26:31-35; Luka' 22:31-34-Zohane' 13:36-38)

27 Dizi minikevo Izesu' ti' lo lo-ngimine': Mono' Godolou' nene O'moso'mo line' gamazi ma ti' li gizi nizani' ve: Gizebo ve'ine belekuvo sipisipi ize hutile' igi vilisave. Ti' li gizi nizani' nenako lingine muki' huli-nidii vilisani'za 28 helekuvo O'moso'mo nele'mize otavo gomu' molo-lengemo nGalilaia misubouko volosuve. 29 Lavo Petolo' aza ti' lo lo-imine': Ingine mukito' huli-gidii vilizani'za neni' nene mo ne'mine amolosuve. 30 Lavo Izesu' ti' lo lo-imine': Lamineto' nolo-gimuve: Idise holuka' gehepeve nene okoloho nolo seta' olihe molamivo gaza gamene setohamo ataize lo-nedelesane. 31 Lavo Petolo' pigi izo ti' lo line': O'ove. Ge gibili hili nesi nibili hililisa lilizanikisi nene ataize lo-gedamolosuve. Lavo izapahala zuho linge nesi a'mine'mine li osu' lani'.

Izesu' Gesemani Za Zuhou' O'mosola Lo Minine' Gamazi

(Mataio' 26:36-46; Luka' 22:39-46)

32 Ido' ingine vi ebe' ma gulive Gesemani nela vi hetelikevo izipahala zuho ti' lo lo-ngimine': Naza O'mosola nololongumu' lingine melo' mito' minilo. 33 Ne'mine lo Petolole Zakobole Zohanenginevo' ngele'mizo novivo Izesu' mulunou' nene api' ogo hongili' hongili' ogo minivo gala muki' gilidi'mo mulumo naba gelo 34 ti' lo lo-ngimine': Naza mo mulu'neu' mulumo goloso ogo geni naba idi'mo heleloni' akalo' mine molokuve. Lingine melo' gizebo igi ningi minilo. 35 Izesu' aza ne'mine lo ngomo ma hoto'ile novo misubolo' golo hizo ongo a'mine mulumo gamene nene ivile' ogo vilido' o noline' nene ivile' ogo viliho lo ivile' ogo vilingumu' O'mosola lo ti' lo line': 36 Ahono me'neho make, oso' amoso' initekisi ha ilinido' o neine' nenako mulumo ekese' naani' mene do olovo' o-nedezo. Do olovo' o-nedeline'za neni' lu'nelo' amozo. Asi gei' lukalo' ozo. 37 Ne'mine lo tine' molo vo okise ingi nizavo ningo Petolo'ni ti' lo lo-imine': Simoni, gaza okise ongo nabe. Gamene ngomosi vanu aua ne'minemu' ha veka ma ninge minamilinido' o nehe. 38 Lengemengu' milalizangu' nene gopo ikelizaze. Gizebo igi O'mosola li minilo. Ee, lutine ne'mo gono dalosa neiha okodine ne'mo nene geni o neive. 39 Ti' lo lo-ngemo gohi vo gomu' lidi'mino O'mosola loo 40 gohi tine' molo ogo ningine' nene ve'ine hihi' ogavo okise ingi nizavo ningine'. Ne'mine neivo nadive lo-emelone lii li-imiliza gamazimu' vise' igi minani'. 41 Gohi vosa ihe' ogo gamene setohamo ogavo ti' lo lo-ngimine': Okise ingi mini gililisa gili nizahe. Mo a'nesi' ve. Ningilo. O'mosolati' ve gihile neni' nene di soto' igi ve golosoliti a'ningu' milalizani' gamene nene mo ogaze. 42 Otilo. Mo volonge. Ningilo. Biluvalite dalizave lo neze do soto' ilive nene mo avito' ogave.

Izesu'ni Analo' Di Gonito' Ele'mizi Vani' Gamazi

(Mataio' 26:47-56; Luka' 22:47-53; Zohane' 18:3-12)

43 Ti' lo nolo-ngimivo a'mido' geto izipahala zuho tuvelu engikuti' ve gono'nibo Zuda' aza ogo heteline'. Ido' eveneto' medeli mini O'moso inite' lehizi-daa' ave nabasi mono' apizi ngimaa' avesi mono' gizebo vesi mini evene' muki' ngimiselikevo bainati mitekisi gavososi davo Zudalesi maka' ani'. 44 Ido' olihe igi hetelami Izesu'ni do soto' o-ngidive ne'mo gomu' ti' lo lovo gize ngimine': Golo elo nalo ve nene mo a'mine ve mineleseize. Dalo. Golise valize. Gizebo lamine' igi ele'mizi vilo. 45 Ne'mine losa Izesu' neida geto vo Tisazo loo golo elo nani'. Golo elo navo 46 maka' ave ingine ningi analo' dani'. 47 Ne'mine ikevo Izesulesi a'mida minaveuti' mali'mo bainati mite' gokuti' gelelehe' ogo eveneto' medelo mino O'moso inite' lehize-daa' ive nabali'mi gelekele' izipe'mi gala belo hasa' o huline'. 48 Ido' Izesu' aza analo' dave ti' lo lo-ngimine': Gizengize ve ma dalisa iga' adi'mine igi bainati mitekisi gavososi di neni' dalisa ahe. 49 Naza gamene gamene mono' numuno nabau' linginesi maka' mino mono' apize ngemaa' uvoni' malo' nene a'nelo' damani' nehe. A'mine gamene malo' a'nelo' dami mini idise mene dani' nene mono' godolou' gizi nizani' gamazi ma nene gihile izeline' nenaze. Ha ne'mine ilo. 50 Ne'mine lavo izipahala zuho muki' huli-di golise vani'. 51 Golise vikevo goso've ma lavolavo mokonokovo' liko e'meto novivo ezesi dani'za 52 lavolavolokovo' dikevo lavolavo apase hito baka' golise vine'.

Kanisoleliti Ve'nido' Izesu'ni Goni' I-dani' Gamazi

(Mataio' 26:57-68; Luka' 22:54-55, 63-71; Zohane' 18:13-14, 19-24)

53 Ido' Izesu'ni ele'mizi eveneto' medelo mino O'moso inite' lehize-daa' ive naba neida vani'. Ne'mine ikevo eveneto' medeli mini O'moso inite' lehizi-daa' ave naba mukikisi mono' apizi ngimaa' avesi mono' gizebo vesi muki' di gese' ani'. 54 Izesu'ni ele'mizi nivavo Petolo' aza hoto'ile e'mete-do ogo heta minamo a'mine dizi minani' numuno nene vodo vodo ogo minavo oluso' misubo vovo haza minido' gelekele' izipe olo' gizi lahizi minangukisi hozi dizo vovo'ningu' mino olo' lahizo minine'. 55 Ne'mino neivo eveneto' medeli mini O'moso inite' lehizi-daa' ave nabasi Zuda veti kanisole vaikisi mini nani lihimemu' Izesu'ni belelone li lihime've li soto' ilizavemu' vise' ani'za 56 evene' muki' soza saza gamazi likevo gamazi'ine vo hamo' amivo bililizado' o minine' gamazi ma di soto' amani' ve. 57 Ne'mine ikevo malite oti soza saza gamazi ezemu' ti' li lani': 58 Aza ti' lo livo gilune' ve: Mono' numuno naba mene evene' a'inedunu' gizani' nene izo kuso gamene setohamo ogavo gohi ma evene' a'inedunu' gizamilizani'za neni' lokuvo soto' oloseive. 59 Ti' lo live li lani'za engi' gamazi nene vo hamo' amivo 60 eveneto' medelo mino O'moso inite' lehize-daa' ive nabali'mo vovo'ningu' ote mino Izesu'ni longo' o-do ti' lo line': Gaza nilani' gamazilo' mene do velepe' izo lo-ngemeline' gamazi ne nomihe. Mene ve nete geikumu' nilani' gamazi nene gelanivo nadi' o neive. 61 Ti' lo longo' o-dine'za aza vele bizo mino gamazi ma do velepe' izo lo-emamine'. Ne'mine amivo eveneto' medelo mino O'moso inite' lehize-daa' ive naba aza gohi longo' o-do ti' lo line': Gulive do hozi laa' nounive O'moso ne'mi gipele do lu' izelive lo imiselelesa live ma nene gei' ne nabe. 62 Ne'mine lo longo' o-davo Izesu' aza ti' lo line': A'mine ma nene nouve. Ido' O'mosolati' ve gihile naza nene amuzo'vesi minive O'mosoloti' lemo nouvoni' nenako nemu' ana hulaa' ida mito' nouvo ningilisave. Ido' Okulumoto' limuso avilelo' nolimuvo ningilisave. 63 Lavo eveneto' medelo mino O'moso inite' lehize-daa' ive naba ne'mo Izesu' aza O'moso ivile' olosa gamazi goloso lihe lo gala giline' nene ngelebizelesa asi've ngolokine' genegana've nene do nohikelo ti' lo line': Lihime've li soto' ilizavemu' nene gohi nanimu' vise' olone. 64 O'moso ivile' o-do gamazi goloso line' nene langisetine mo gilikeve. Nemu' lingine gilikevo nadi' o neive. Lavo ingine mukito' ti' li lani': Aza nene mo lihime naba daanako mo helelido' ogave. 65 Ne'mine likevo malite gituho' i-di velelo' hiti mini a'ine gavoso nibili ti' li lani': Zaho nogibilihe. Gaza polohetelite laa' adi'mine ogo lo soto' ogo lo-lemezo. Likevo gelekele' izipe nete Izesu'ni di a'ine gatapa' gavoso bilani'.

Petolo' Izesu'nimu' Ningamuve Ve Lo Ataize Line' Gamazi

(Mataio' 26:69-75; Luka' 22:56-62; Zohane' 18:15-18, 25-27)

66 Ne'mine igi nizavo Petolo' aza numuno vodo vodo ogo minavo oluso' omo' naba minido' gala'muda neivo eveneto' medelo mino O'moso inite' lehize-daa' ive nabali'mi gelekele' alu mali'mo ogo 67 Petolo' nene olo' lahizo neivo ningo ninge lamine' ogo ti' lo line': Gazasi nene Nasalete ve Izesukisi minaa' asive ma nene nane. 68 Ti' lo line'za aza o've lo gaza laine' gamazi nene gelamo a'mine'mi monovosi gele lamine' amuve line'. Ne'mine loo gateda lemo vo minine'. 69 Minavo gelekele' alu ne'mo gohi eze ningo a'mida minave gohi lo-ngimine': Mene ve nene a'mine zuhouti' ma ne neive. 70 Lavo gohi ataize gehepeve line'. nGomo lasolo ma nimini a'mida minave nete Petolo'ni ti' li li-imani': nGalilaialati' nainako gaza nene mo lamine' eze zuho nane. 71 Ne'mine likevo aza gosoho' noluvo ma O'moso'mo usi' ize-nidivo loo lamineto' noluve. O'moso'mi velelo' lo huko noluve lo ti' lo line': Lingine naza ma ningo gelamuvemu' nilave. 72 Lavo okoloho ne'mo a'mido' geto nolo gohi ma molavo gamene seta' ine'. Ne'mine ogavo Petolo' aza Izesu' lo-imine' gamazi nene okoloho nolo gamene seta' olihe molamivo gaza gamene setohamo nenikumu' ataize lo-nedelesane lo line' gamazi nene gohi gelo ive naba goloso ine'.